Л. 1. В лета благосестивого государя царя и великого князя Ивана Василевича всеа Русии и при его царских детях царевичах Иванне и Феодоре Ивановичех всеа Русии 7079 г. откудуж прииде Бог весть в Ростов прииде муж добророден и благозрачен, и благолепием украшен и кротостию, и смиренномудрием преисполнен. Власы имея темнорус, браду немалу, на власяницы ж имея милоть по-иночески. Пристанища ж не име нигде, кроме церковных рпитворов и папертей, идеж изволи. Моление же его… день и нощь греческим речением… ради ж некия
Л. 1 об. нужды прибегая к некоей вдовице, да ко отцу своему духовному ко всесвяцкому священнику Петру, зовомый Иоанн Власатый.
В та же лета бе в Ростове Иван Болшей Колпак, и той многа знамения и чюдеса сотваряет, прорицая многим, и архиепископу Евфимию, и збысться, и отиде в царствующий град Москву, и чюдодействуя много, и почи о Господе у Покрова Святыя Богородицы на рвоу.
В та же времена бе в Ростове Христа ради юродивый Третьяк, имя ж бе Артемей, и той бе во единой срачице зиму и лето, и все бегал, прибегал к Вознесению Господню и к Сидороу
Л. 2. чюдотворцу, и той многа чюдеса творил и объявлял. Некогда ж ему бывшу два дни и зело печальну, ни яде, ни пит, ни с кем глагола. В третий ж день нача по всему граду бегая вопити: стреляй, вешай, скачи, пей, умывайся, ложися. В третий же день с Москвы ведомо, государь царь Иван Васильевич бояр своих ближних и дьяков казнил многими муками двесте человек. Пища же его – бежучи, ухватит полуденежной колачь, и ухватит зубы своими, и держа в зубах, весь колачь исчиплет и розмечет, а что в роте, то была у него пища, и преставися без мене,
Л. 2 об. положен на монастыре у Вознесения Господня против гроба Исидора чюдотворца, и на нем цка подписана.
Святый же Иоанн Власатый преставися в лето 7089-го сентября в 3 день, по повелению же его по трех днех вдовицею и отцом духовным поогребен за градом у священномученика Власия за олтарем. И быша знамения велия и чюдеса многа, и громи и молнии, и пожжение домом и церквам. По преставлении же его вернии приходяще ко гробу его и доднесь, молебная совершающе к Богу и ко пречистой Богородице,
Л. 4. и ко Иванну Предтече честнаго его собора, и пев молебен, и воду святив, и от гроба его приим персти, и положив во святую воду, и болящему дающе пити, и по всему телу его мажуще, и здрави отхождаху в домы своя. И святую воду и персть в домех своих болящим подающе пити, истирахуся, и здра(ви) бываху, не токмо человеци, но и скоти.
Ащели коему болящему по трех днех облегчения Господь не подаст, да посему ура(зу)мевают, и душа своя устрояют, и житие свое исправляют, к вечному блаженьству прелагаются.
Л. 4 об. Некогда же ростовскому митрополиту Кирилу в старости своей от многаго труда и подвига и всенощнаго стояния и соборнаго пения, и коленнаго ради поклонения, впаде в недуг и отъяся рука и нога, и всею плотию ослабе, ничим же не владе, и с места на место не можи преходити, но ни двигнутися, но точию в креслех его и в церковь приношаху. И многое время не литоргисаше, и отчаяся своего святительского престола, и ожидаше собе сего света к Богу отшествия, молитва же его к Богу от уст безпрестанно изходяща, и ко пречистой Богородице, и на помощь призывая ростовских
Л. 5. чюдотворцов, да бы Господь Бог подал ему разрешение от недуга. И многое время пребысть в том недузе, и не презре Господь моления его, и внезапу возвещено бысть ему митрополиту о сем блаженнем Иванне Власатом, по многонародному же речению, о милостивом Иванне, како многонародное множество приходяще ко гробу его, и молящеся Господеви, пречистой Его Богоматери и крестителю Господню Иванну Предтечи честнаго его святтаго собора, поют молебны и воду святую пив, и от гроба его взяв персти, и во святую воду влагающе, приобщаются, и всю плоть свою со святою водою
Л. 5 об. стирают, и исцеление приемлют от Господа.
Митрополит же сие слышав от многих, зело порадовася, и повеле себе нести ко образу Иванна Предтечи и ко гробу Иванна Блаженнаго, и гда достигох и узре образ Спасов и пречистыя Богородицы и Иванна Предтечи, и гроб блаженнаго Иванна Власатого, нача молебная творити к Богу (сле)зы точа, яко струя, прося милости о исцелении. И егда нача чести святое Евангелие, и в той час митрополит пременися от недуга, и нача в себе всем владети. И вси людие видев, радующеся, хвалу воздая Христу Богу нашему и пречистой Богородице, и Предтечи Иванну, и блаженному Иванну Власатому.
Л. 6. и отиде от гроба здрав, радуяся. Видев же во граде вси люди митрополита здрава, хвалу воздаяху Богу нашему и Пречистой Богородице и Иванну Предтечи, и угоднику их блаженному Иванну, и проводив до кельи, и благословение получив, отиде в домы своя, радуяся. И нача литоргисати митрополит, якоже бе и прежде, и поживе едино лето и месяца шесть, и служа литоргию, отиде ко Господу.
Царскаго дворцоваго села Поречья крестьянина Михаила(…) жена именем Агрепена впаде в недуг, язык и рука отъяся, и многи дни
Л. 6 об. пребысть в той болезни. И слышах о сем блаженном Иванне, яко мнози к нему приходяще болезнении, и здрави отходят, языку ж ея отнюдь не могий проглаголати, токмо слышанна е помаванием руки. Родители ж ея уразумеваху, яко в град повеле себя вести. Во граде же помаванием по церквам. И дойде до церкви святого Власия. И узре гроб блаженнаго Иванна, и повеле молебен пети Иванну Предтечи. И кончав молебная, и взем иерей от гроба святаго перьсти, и вложи ю во святую воду, и повеле ей пити, она же со тщанием выпи. И пад ко гробу, лежа на долг час плачася. И
Л. 3. внезапу воскрича велиим гласом: святый Иванне, помози ми. И абие язык ея разрешися, и рука бысть здрава, якоже и другая. И всем бысть радость ту предстоящим, приимши исцеление и славя Бога и угодника его блаженнаго Иванна, и пойде в путь свой, радуяся.
Града Ростова некая жена Анна Божиим посещением всеми составы разболеся, не можи ничим двигнути, и бе год, и нога ея прикорчися к седалищу. Плотию же оздраве, и ползаше по земли, и Христовым именем питаяся, ко гробу ж блаженнаго
Л. 3 об. Иванна приползаше, и моляся, прося от Бога милости исцеления. Некогда ж приползше к заутрени, и седе близ гроба святаго Иванна, и моляся пилежно, плачющеся, и егда нача пети славословие, таже вдова Анна возопи велиим гласом, и лежа на земли, и превратися, нога же ея распростирашеся и скорчевашеся, и бысть безгласна мног час, и помалу аки от сна возбудися, и воста на ногу здрава. Она же вопияше и призывая угодника Христова Иванна блаженнаго, и получив исцеление от Бога, поиде в дом свой, радуяся и славяще Господа и угодника его Иванна блаженнаго.