Месяца маия в 28 день память святаго отца Игнатия, епископа Ростовскаго.
Прославим всемилостиваго Бога и Пречистую Его Матерь, еже в нынешнее время, в последняя лета, прояви Бог таковаго великаго светильника, солнца церковнаго, его же просиявша многими добродетельми. Святый преподобный Игнатий от благочестиву родителю рождейся, и воспитан в великом наказании в добродетели мнозе. И разсмотрив суету жития сего, отвержеся мира, и бысть мних, и за премногую его добродетель поставлен бысть архимандритом, в Ростове в Богоявленском монастыре, таже поставлен епископ от митрополита Киевскаго Кирилла втораго, в лето 6770, а от рождества 1262. Сей епископ Игнатiй покры оловом соборную церковь Ростовскую и дно ея красным мрамором помостил в лето 6788, а от рождества 1280. Того же года запрещен бысть от священнодействия Кириллом, митрополитом Киевским, вины ради сицевыя; Князю ростовскому Глебу Васильковичу умершу и в соборней церкви Ростовской погребену бывшу, минувшим десяти неделям погребения того, изрину тело из церкви безчестно в полунощи, и повеле нести в монастырь Святаго Спаса, иже бе княгинин, закопати его просто в земли. Митрополит же в то время проходи грады Российския и исправляя духовныя управления, пришед в землю Суздальскую и уведав о том, еже сотвори епископ ростовский Игнатий, отлучи его от святыя службы, яко не богоугодное дело сотворша, и бе в запрещенiи епископ Игнатий некое время, дондеже не умоли о нем митрополита князь Дмитрий Борисович, и прости его митрополит, глаголя: Не возносися и не мни себе безгрешна быти и не толь много буди запрещая и отлучая, елико освобождая и прощая; ибо и мы нашим грехом прощенiе обретаем в прощении братий наших, и милост Господня в милости ближняго сокровена суть. Буди убо каяся до кончины твоея за дерзнутое дело твое, понеже прежде суда Божия осудил еси уже умершаго, его же прежде жива бывша стыдился еси и дары от него принимал еси, и ял и пил еси с ним, и веселился, и егда бе мощно исправити его, не исправил еси, то ныне ли хощеши исправити по смерти жестоко отлучая? Аще хощеши помощь ему сотворити, сотвори убо к Богу теплыя молитвы, и божественных жертв Его безкровных о душе приношение и молитвами Бога о нем упроси. Сице митрополит Кирилл епископа Игнатия отечески наказав, прости и благослови его. Потом приим церковь Божию, и епископом граду Ростовуь паки бе, и пасяше добре порученное ему от Бога стадо. И пребысть в святительстве лет двадесять и шесть, добре пася церковь Христову, в лето 6796 преставися к Богу священноепископ Игнатий, месяца маия в 28 день, в пяток по вечерни. И удариша в колокола, и стечеся весь град множество безчисленно народа, и бысть плачь неутешим, оставляюще своего пастуха и учителя, в болезнех и в печалех помощника и избавителя, вдовицы и сироты аки оборонителя и заступника, нищии и убозии аки кормителя и питателя, иерейский чин и мнишеский, князи и вельможи аки наказателя и учителя. И тако вземше святое его тело, и понесоша в церковь, и за множеством народа не могоша внести, понеже снидеся народа множество без числа.
В то же время приидоша две черноризицы благоговейны, едина именем Феодосия, бывши жена Павла протодиакона его, отнюдуже поястася законом брака, и изволиша девственное чистое житие о Бозе, и весь живот свой в молитвах и посте поживша, послушествовании от всех чистоты ради жития. Павлу же к Богови отшедшу, и си въсприя мнишский чин. И другая черноризица именем Оксиния, и та благочестива и житие добродетельно имуща.
Те две видеста сие чюдо, и инии мнози видевше, имже Бог откры. И егда понесоша святое тело его к церкви, воста от одра в своем святительском подобии, и пойде по воздуху, и ста горе над церковию, и благослови люди и весь народ, и потом сступи на нижнюю камару, яже над жертвенником, и ту положиша тело его Божиим изволением. Се же видение откры Бог преподобныма женама, сим прославляя угодника своего. И егда поставиша пред церковию и певше канон за упокой, и сътвори Бог чюдо: Стефану архимандриту прикоснувшуся святем теле его, бе бо перст его ручный прикорчился к длани от рожения его, и в том часе простреся. И тако внесоша и в церковь. И наутрия створше обычную службу и пение. И егда вложиша и в гроб, и даша ему свитки, ихже святи в животе своем, прозвитеры и диаконы, и простер руку принят я якоже жив. И видевше второе чудо, в ужасти быша и радости велице. Преставися ко Господу, по прологову известию, в лето 6796, а от рождества 1288, мая в 28 день; пас церковь Божию 26 лет. Потом житие преподобнаго сего не предано бысть писанию и доселе; аз же худой и смиренный, убояхся осуждения лениваго раба, скрывшаго талант, глаголюща, яко яр есть господин мой, жнет идеже не сеяв, и събирает, удуже не расточив, вмале написах житие преподобнаго сего святителя Игнатия, да и нам Бог подаст оставление грехов молитвами его о Христе Иисусе Господе нашем, Ему же слава и честь и держава Отцу и Сыну и Святому Духу, ныне и присно и во веки веком. Аминь.
литература
Жития святителей Ростовских Леонтия, Исаии и Игнатия. Ярославль, 1887. С. 29