Жития святителей ростовских Леонтия, Исаии и Игнатия. Ярославль, 1887.

С. 25.

Святый Исаия епископ Ростовский.

Сей убо блаженный Исаия от земли Русския, от области Киевския рождение и воспитание име. И от юны версты мир оставляет и Христа возлюбив. И приходит убо в Печерский монастырь, иже на Киеве, и тамо остризается, и всех долу влекущих и тленных мира сего оставляет и сожительник бывает во всем и подражатель преподобному Феодосию. И превосходит многи житием и постом и молитвою, и всеми добродетелями, и в телеси убо яко ангел является, терпением мужества своего страсти телесныя побеждает, и крепкий воин Небесному Царю является.

По Божию строению приходит убо благоверный и великий князь Изяслав, сын великого князя Ярослава, в монастырь к преподобному Феодосию, и просит у него блаженнаго Исаию в монастырь святаго Димитрия на игуменство. И преподобный Феодосий дарует ему, яко некий дар, сего блаженнаго, и Иона митрополит поставляет на игуменство в монастырь святаго Димитрия. В лето 6570 блаженный прииде в монастырь, и бывает истинный пастырь и наставник тамо живущей братии, а не яко же наемник и не радя о овцах. И вдасть убо себе на больший подвиг, ревнуя апостольскому житию, благими убо делы душу просвещая, тело же изсушая, труды ко трудом прилагая, учением же своим верных души напаяя на истинный разум, к Богу приводя.

Многия же ради его добродетели избранием Святаго Духа поставлен бывает к граду Ростову епископом в лето 6585 от митрополита Иоанна, и достизает убо своего престола.

Блаженный же виде люди тамо новокрещеныи и неутвержденныи в вере, яко новосажденный виноград напояет убо тех своим учением, возращает в добродетелех, плод сторицею благому Владыце приносит, якоже благий он раб, и обходит убо прочыя грады и места иже в Ростовстей и Суздальстей области, и неверных увещает веровати во Святую Троицу, Отца и Сына и Святаго Духа, и просвещает святым крещением, верных укрепляет неподвижным и непоколебимым быти в вере, идеже обретает идолы, вся огню предаяше, и по всему ревнуя апостольскому житию.

И елико же он тщася дело равно апостолом сотворити, толико и Господь Иисус Христос, праведный Судия, дарует тому дар равен со апостолы: якоже убо славнии апостолы на облаце носими на преставление Божия Матере, тако и сей блаженный облаком носим бысть на священие храму Божия Матери.

Егда убо совершена бысть цековь Святыя Богородицы монастыря Печерска, иже на Киеве, и блаженному митрополиту Иоанну уже ко священию церкви приготовльшуся, и во скорби и печали велице бывает блаженный митрополит, яко ни единому епископу не сущу с ним на освящение чудныя тоя церкви Божия, каждый епископ на своей епископьи пребываше тогда, разстояния местом далече имеюще, блаженный Исаия в Ростове тогда пребывает.

И во един убо от дний, блаженному Исаии на молитве стоящу, внезапу юноша страшен предста во одежде светлей, и глагола ему: «Заутра в 14 день августа свящается церкви монастыря Печерскаго, и митрополит вас ради в великой печали, и да будеши тамо с ним на освящение». Блаженный же вскоре востав, и в ладию всед, и пловяше. Нощи же приспевшей, иже с ним люди в ладии поучив блаженный от божественнаго писания, и возлещи тем повелевает почити мало от труда. И заутра все со блаженным под Киевым обретаются. Преславный в чудесех Исаия приходит ко митрополиту Ивану. Митрополит же почудився и вопрошает блаженнаго о пришествии его. Святый же Исаия глагола ему: «Присланный от тебе, владыко, глагола ми: в 14 день августа свящается церковь святыя Богородицы монастыря Печерскаго, и готов будеши с митрополитом на освящение. Аз же не смеяв преслушатися, владыко, твоего повеления, и се приидох». Тогда же приидоша и инии епископи на освящение и такожде поведаху. Митрополит же вельми почудився преславному тому чюдеси, яко николи же посла беяше по епископи. И вкупе освящают церковь Божия Матери, и литургию совершают Богу и пречистей Его Матери о преславнем чудеси. Священа бысть церкви Печерская святыя Богородица митрополитом Иоанном, епископом Лукою Белогородским и Иваном епископом Черниговским и Исаием епископом Ростовским в лето 6597 месяца августа в 15 день при благоверном князе Всеволоде.

И паки святый Исаия не умедли, но скоро на облаце носим бысть, поставлен бывает в Ростове у своего престола, в дому Пречистыя. И добре упас порученное Христово стадо словесных овец, и ко Господу преставися, Егоже измлада возлюби. И блаженное его тело погребено бывает во церкви святыя Богородицы во граде Ростове.

По многих убо летех по сгорении чудныя церкви древяные в лето 6672, копающим ров каменной церкви, обретают убо гроб блаженнаго Исаия. Отверзше же и видеша ризы и тело святаго цело и нетленно, прославиша Бога и Его Пречистую матерь, иже не токмо в житии сем, но и по смерти прослави своего угодника святаго Исаия, яко толики многими леты блаженнаго ризы и тело бысть тлению не причастны.

И егда же соделаша церковь, и полагают святаго в притворе на правой стороне входа в церковь. Многа же и чудеса быша от святого телеси. Многим же убо летом минувшим, и в небрежении бысть святаго гроб, яко николиже в притворе оном свеще горети у гроба святаго, ни священнику приходити с кадилом ко гробу.

Архиепископ же тоя соборныя церкви Божия Матере, видев образ святаго Исаия почитаем и поклоняем от всех, гроб же его заключен и в велице небрежении пребывающ, в 15 день маия созывает священники тоя церкви святыя, и молитву сотворив, касается пречуднаго отца чудоносному гробу, преносит оттуда блаженнаго во святых Исаию в лето 6782, и полагает с великою честью в новом гробе на той же стране близ дверей, иже к югу, идеже и доныне с верою приходящим ко гробу его подает исцеление.

О, блаженный учителю наш, не преставай моляся о нас с Богородицею и со святители, предстоящими престолу Христову, да молитвами вашими избудем от глада и пагубы, и нахожения иноплеменных, и от всех злых, и зде богоугодно и праведно поживем, и в будущем веце со всеми праведными будем общницы вечных благ, славяще Святую Троицу, Отца и Сына и Святаго Духа.